សន្ទស្សន៍ S&P500 ធ្លាក់ចុះ ៣,២០% សន្ទស្សន៍ Nasdaq ធ្លាក់ចុះ ៤,២៩% សស្សន៍ DJIA ធ្លាក់ចុះ ១,៩៩%។ ចំណែកសន្ទស្សន៍ VIX កំពុងជួញដូរនៅប្រហែល ៣៤,៧៥ ដែលបង្ហាញថា ទីផ្សារកំពុងស្ថិតក្នុងទិសដៅធ្លាក់ចុះដដែល។
ការធ្លាក់ចុះនៃតម្លៃសន្ទស្សន៍ភាគហ៊ុននេះ កើតឡើងដោយសារក្តីព្រួយបារម្ភទៅលើការដំឡើងអត្រាការប្រាក់បូករួមជាមួយនឹងការធ្លាក់ចុះនៃការអភិវឌ្ឍសេដ្ឋកិច្ចសកល។ អត្រាការប្រាក់ក៏ត្រូវបានរំពឹងទុកថា នឹងដំឡើងបន្ថែមទៀតផងដែរ ដើម្បីទប់ទល់ទៅនឹងការកើនឡើងនៃអតិផរណា។ ជាងនេះទៅទៀត ការដំឡើងអត្រាការប្រាក់នេះបានធ្វើឱ្យសន្ទស្សន៍នៃប្រាក់ដុល្លារមានការកើនឡើង ខណៈសន្ទស្សន៍នៃប្រាក់ដុល្លារកំពុងជួញដូរក្នុងតម្លៃ ១០៣,៦ បន្ទាប់ពីមានការកើនឡើងទៅកាន់តម្លៃ ១០៤,១៩ ដែលជាតម្លៃខ្ពស់ក្នុងរយៈពេល ២០ ឆ្នាំ។
ម្យ៉ាងវិញទៀត ទិន្នផលនៃបណ្ណបំណុលរតនាគាររបស់សហរដ្ឋអាមេរិកបានកើនឡើងយ៉ាងខ្លាំងលើសការរំពឹងទុក ដោយសារតែការរឹតបន្តឹងនូវគោលនយោបាយរូបិយវត្ថុរបស់ធនាគារកណ្ដាលសហរដ្ឋ-អាមេរិក។ រីឯវិបត្តិសង្គ្រាម បើទោះជាមានភាពស្ងប់ស្ងាត់នៅក្នុងសារព័ត៌មានក៏ដោយ ប៉ុន្តែវាអាចនឹងកើតឡើងនូវភាពតានតឹងសាជាថ្មី បន្ទាប់ពីមានសេចក្តីប្រកាសពីនាយកប្រតិបត្តិនៃក្រុមហ៊ុន Lockheed Martin ថា ក្រុមហ៊ុននឹងធ្វើការបង្កើនផលិតកម្ម ២ ដង (២ ១០០ ទៅ ៤ ០០០ ក្នុង ១ ឆ្នាំ) នៃអាវុធមីស៊ីល Javelin ដែលជាអាវុធសម្រាប់ប្រឆាំងនឹងរថក្រោះ ដើម្បីជួយប្រទេសអ៊ុយក្រែនទប់ទល់នឹងប្រទេសរុស្ស៊ី។
សម្រាប់ការវិភាគជួញដូរក្នុងសប្តាហ៍នេះ វិនិយោគិនអាចពិចារណាលក់សន្ទស្សន៍ Nas100 នៅតម្លៃ ១២ ៦៧០ ដោយកំណត់មុខងារការពារហានិភ័យក្នុងតម្លៃ ១២ ៩០០ និងមុខងារទាញយកប្រាក់ចំណេញក្នុងតម្លៃ ១២ ១០០៕
វិភាគដោយ៖ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល
